Dispôy li moyin-adje

Å moyin-adje, c’ èst l’Èglîse qui mambornèye Ritchèle. Li viyèdje fêt pårtèye dèl fôrtèrèsse di Tchîvrimont disqu’ an 779, èt pus tård, Oton èl donne ås Tchapite d’Åhe.

Cès djins-la ont lès minmes dreûts qu’on Signeûr, èt il ont dès bins (grozès mohones ou pitits tchèstês). Li Signeûrerèye n’ èst nin foû grande (ine cintinne di djins), mins èlle a ine Coûr di Djustice, ca cåsi tos lès viyèdjes ont leûs lwès èt leûs acostumances.

I-n-a treûs sôrs di djustice : li hôte, li basse èt eune inte lès deûs (fåt veûy li gråvité dè sudjèt).

Li Hôte-Coûr si tind a Dålèm (la qu’ Ritchèle ènnè fêt pårtèye). Èle djudje lès moudreûs, lès macrês (èt lès macrales), èt lès målès rouflådes. C’ èst lèy qui dit çou qu’on deût rinde ås cis qu’ont stu ac’sûs ou bin qui fèt pinde ou côper l’ tièsse dès pus måvas. Qwand çoula arive, on lêt lès cwérs å l’ouh, po qu’ tot l’ monde lès veûsse bin.

Li Coûr di Djustice di Ritchèle ni mah’nèye nin divins dès istwéres de cisse sôre-la.

Èle prind pus vite astème ås doganjes di viyèdje (sins nou mwért !), ås karèles di trèfoncîs èt ås afères d’ èritances èt d’ dètes. C’ èst lèy qui dit kibin qui l’ ci qu’a twért divrèt payî (Li pus tchîr, c’ èst treûs vatches).

Lès assimblèyes si t’nèt al novèle leune èt al plinte leune, ca, di c’ timps-la, on comptéve pus vite lès nut’ qui lès djoûs.

Come c’èsteût dès fwért dènès rèscontes, lès djudjes ni polît fé nole cråsse eûrèye èt co mons beûre on bon p’tit vêre di qwè qui c’ seûye divant dè rinde leû djustice.

Après lès plêtièdjes, c’ èsteût ine ôte afêre : Lès Borguimêsses èt lès bordjeûs fît leû tchèt dèl bîre èt d’ totes lès glotin’rèyes qui lès novês mêsses d’ on bin mètît so l’ tåve por zèls.

An 1239, li duc di Brabant rassonle li conté d’ Dålèm èt lès vîs payis d’ Fåcômô, Rolduc èt Limbôr po ‘nnè fé li province di Limboûr, pièrdowe inte tos-ètrindjîrs.

Po djåser on pô dèl réligion,, Ritchèle divint ‘ne pôrotche an 1287. Divant çoula, lès cis d’ Ritchèle divît passer Moûse po-z-aller a Hèrmale, èt, télefèye, ci n’ èsteût wère åhèye.

Come di djusse, li novê priyèsse di Ritchèle foûrit oblidjî di d’ner dès çanses å priyèsse di Hèrmale (I n’ pièrdît måy nole ocåsion d’ wangnî ‘ne saqwè !).